2019年7月20日 星期六

深度對話

香港搞到今時今日咁嘅地步, 筆者覺得無論邊個啱邊個唔啱都好, 打又打過鬧又鬧過。
目前大家都有逼切性需要一齊坐低進行一次深度對話,希望能夠解決到一啲社會意見及分歧。
雖然筆者明白開會嘅氣氛或者內容都係面斥不雅居多,但係點都會有啲意見係有用嘅, 只要政府方面肯放下身段同香港市民 喺立法會大樓內定期咁傾, 互相畀意見, 相信好多問題都會得到妥善嘅解決或者妥協方案,市民亦都會見到政府方面係有誠意傾嘅, 到時開會嘅氣氛就會逐漸改善, 成效就自然會提高。
其實筆者都唔想寫呢篇文章,但係覺得香港唔應該繼續咁樣搞落去, 希望雙方面進行一次深度對話去改善政府與市民嘅關係。
但係筆者聽聞又話派糖,但好多家長都明白糖份一過,小朋友都會繼續嘈嘅,問題根本冇解決過,不如用呢啲錢買啲流動性返嚟好過,起碼有啲社會問題可以舒緩一下。

歌曲:深度對話 于文文




2019年7月19日 星期五

買入大新金融 以免夜長夢多

筆者年頭嘅時候錯過咗一次買入大新金融嘅機會, 其實就只差一兩日嘅時間,剛好大股東就宣佈作價38.17元買回另外一個股東嘅部份持股,因此緣慳一面。
為免夜長夢多,今日買入倆千股大新金融。
計番公司末期息1.09元同當時距離唔遠,但大新金融目前嘅資產折讓實在太高,其他資產唔講,淨係計持有接近75%嘅大新銀行,現價賣盤都現值接近150億,但大新金融嘅現時市值只有118億。
而且大新金融目前嘅市帳率只有0.487倍, 去年嘅每股資產淨值75.91港元, 每股盈利5.27元,現價有接近四厘股息,而且派息比率偏低,未來要加派息好容易 ,現價真係平到冇朋友。
而大新銀行目前嘅市帳率只有0.77倍,而中銀香港係1.3倍, 所以大新銀行就算以中銀香港嘅市帳率賣盤,大新金融嘅出售收益依然相當豐厚。
畢竟中小型銀行買少見少, 筆者覺得既然有穩定回報就不妨買啲大新金融等待大新銀行賣盤消息。

筆者持有大新金融股份相關權益。

淘金潮後遺症

香港咸豐年前出名遍地黃金,所以吸引咗好多人嚟香港掘金,亦都令到勞動人口持續增加。
但係熟悉金礦運作嘅朋友都應該知道, 新起嘅金礦產量初期會持續提高,人手需要增加係理解嘅。但係當金礦變成老金礦之後產量就會開始下跌,需要嘅人力就自然會少咗。
而且金礦總有掘完嘅一日,只可惜老闆冇一早揼本投資起一個新嘅金礦,加上來港人士越嚟越多,令到而家打工仔分到嘅金粒越嚟越少。
筆者相信經過近期嘅示威事件之後,香港嘅打工仔嚟緊只能夠淘金沙。

雖然老闆後知後覺,而家先去揼本去投資一個叫大灣區嘅金礦,但總算亡羊補牢,為時未晚,為千禧年出生嘅年青人提供一個未來淘金磚嘅機會, 只係可憐咗90後 年青人未來一段時間可能要繼續喺舊金礦入面淘金沙。

而未來有一個地方有可能會成為今時今日香港嘅翻版,呢個地方好可能會係新加坡,待續。

2019年7月18日 星期四

另類實業股

筆者相信時代點變都好, 就算他日你屋企 唔再需要電視機,但洗衣機一定係生活中不可或缺嘅家庭電器。
雖然宜家好多人將啲衫送去洗衣舖或者攞去洗衣舖自動乾洗,但洗衣機依然係每家每戶都有一部,為嘅係方便家人急用。
所以海爾電器係一隻不折不扣嘅實業股, 公司做洗衣機真係做到出神入化,筆者 
希望海爾電器他日技術能夠發展到將衣服放入洗衣機洗完,之後已經摺好送到筆者手上。
加上海爾電器還有日日順在手,物流業嘅發展憧憬一直係股價嘅催化劑。
而公司近年嘅派息及派息比率已經持續提高,但相信派息比率仍有上調嘅空間,有耐性嘅投資者不妨於接近一年低位收集海爾電器作中長線持有, 享受隨著時代變, 洗衣機依舊地位不變嘅效應。

筆者沒有持有海爾電器相關股份權益

2019年6月28日 星期五

買入威勝 靜待業績

筆者今早掛牌2.85元買入3393威勝控股兩萬股,買入價9.3倍 PE, 7%息率,0.6倍市帳率左右。
公司早前宣佈分拆威勝電子訊息於內地科創板上市,但由於內地分拆上市關係沒有分派股份俾小股東,所以股價除淨後依然急跌一浪,直至近日開始大成交並且動力指標回升, 加上主席昨日亦有開始回購增持, 對於中期業績及穩定股價有一定嘅啟示。
加上公司派息一向都好照顧小股東,相信分拆所得都會回饋股東,分享成果。

以公司今年接到嘅智能電錶訂單計算,筆者相信威勝今年嘅業績會大幅回勇。
其實公司去年嘅業績已經有三成增長,只不過前年嘅業績有特殊收益, 顯得大數 有倒退。
加上公司因為今年接到嘅訂單比較多,需要一定嘅現金去接訂單,所以末期息先至略為減少。
公司嘅業務同電網相關,可以算係一隻電力設備股, 但公司近年嘅發展已經牽涉物聯網及機電相關嘅業務, 近年海外業務嘅發展亦都唔錯,筆者相信現價嘅威勝假以時日會成為一隻十厘股。
畢竟全世界嘅電網都要持續升級丶 維修及建設, 環球經濟點變化生意都係唔憂做, 而且公司亦都係業內嘅龍頭之一, 毛利率近年維持在三成嘅穩定水平, 貿易戰對佢根本冇乜影響, 因此筆者於現價買入威勝, 靜待中期業績。

筆者持有威勝控股相關股份權益。

2019年6月24日 星期一

遺忘回憶(上)

筆者有時好羨慕阿爾茲海默症嘅患者,原因係能夠喺晚年嘅時候慢慢咁不論好同壞去遺忘回憶,然後回復年輕時嘅個性及生活方式。
而作為仔女嘅我地,雖然久遠嘅回憶隨著經濟的發展持續消失得無影無蹤,父母講嘅回憶可能連合照都冇一張,同我哋嘅代溝隔咗一個紅海,但亦都係嗰個年代嘅人留低嘅時空記憶, 值得我哋耐心聆聽。

筆者覺得可能隨住時代變遷持續加速,會令到阿爾茲海默症患者有年輕化嘅趨勢。
原因係回憶隨著商業社會嘅運作而持續折舊,令到所有嘢都持續變質, 所以阿爾茲海默症嘅患者持續增加亦都係我哋年輕人嘅責任。

但係時光一去不復返,夕陽西下快如箭, 患者能夠在晚年通過時光隧道回到過去亦都不算是壞事。


2019年6月9日 星期日

逃犯條例遊行示威

正所謂平生不作虧心事,半夜敲門也不驚。
既然你不是逃犯, 並沒有犯下任何罪行, 就算立例對你自身或者其他奉公守法嘅人 影響都不大。
至於擔心被內地方面將一啲敏感人士透過逃犯條例遣返內地就更加係杞人憂天,如果你寫得有理據而且公平公正,相信阿爺 頒個大紫荊勳章畀你都嚟唔切。
正所謂身行腰直,理直氣壯,只希望今日的遊行人士不要因此事而犯上官非,代價十分昂貴而且不值得。

若然在香港有遊行左廿十年有多都沒有成效, 就算示威者如何使用武力,政府嘅取態依然係處之泰然, 因為有法律規管市民, 所以市民遊行示威不遵守法律就正中下懷。

筆者唔反對大家爭取自己想爭取嘅嘢,但有啲規矩仍然係要守嘅。

筆者沒有任何政見取態, 對於政治一早已經冷感, 只係出於好意提醒一下大家注意個人行為切勿過激。